ياللي سافرتي ف حتة
بعيدة
سبتيني وحيدة
في دنيا عنيدة
فاكرة يامه
يانوارة البيت واللمة
كنت دايما تبكي بدالي
تحجزي دمعة كانت
جيالي
أيوة ياأمي
في عز البرد كنت تضمي
لما تشوفي عيون بصالي
بسرعة بتْكبَري وتسمي
ما بخلتيش يوم بالحنية
ما بخلتيش بالصحة عليه
بسهر الليل وأنا موجوعة
عدي معايا ...
كام آهه مني
قُمتي لها
على طول مفزوعة
كنت بشيل حزني ياأمي
وأجيلك بيه
وبسرعة بخرج فرحانة
واسال نفسي جيتلك ليه
لما كنت بتغضبي
وبيعلى صوتك
كنت بغبائي وقتها
بتمنى موتك
كنت بقول ياه
قلبها حتة حديد
قلب قاسي ليه عنيد
أتاريه
كان طعم تاني للأمومة
ولما صبحت أم.. يا أمي
عرفت ليه كنتي انتي
على طول مهمومة
بالخوف عليه
ومن عذاب اسمه التربية
ياللي حنانك
غطى على كل الحدود
صدقيني لو الكون فقدك أنتي
بالنسبة لي الكون مفقود
وغبت ياأمي وتعبت
من كتر العد
كل خطوة بتبعديها
كان جوايا جدار ينهد
فاكرة زمــــان
كنت بنجح لجل مااسمع
ضحكتك
ادفن الآهه جوة مني
علشان مادقش
دمعتك
ألف زهرة رواها عمري
ياقلب قلبي
ف سكتك
وماكنتش أعرف إنك
طماعة وأنانية
شربتي كاس
الموت لوحدك
وبخلتي بيه عليه
اللهم ارحم موتانا وموتى المسلمين وأدخلهم جنات النعيم برحمتك يا أرحم الراحمين